بە پێی ئەو ڕاپۆرتانەی کە بە رێکخراوی مافی مرۆڤی هانا گەیشتووە : سەر لە بەیانی ئەمڕۆ سێشەممە ١٧ی پوشپەڕی ١٤٠٤، کۆڵبەرێک لاو بە ناوی “خالد محەمەدی” تەمەن ٢٣ ساڵ ، کوڕی سەعید و سەرگوڵ ، خەڵکی ئاوایی “ئەنجێنە”ی سەر بە شاری بانە ، بە تەقەی ڕاستەوخۆی هێزە نیزامییەکان لە سنووری “شابدینی بانە کوژراوە .
بە پێی ئەو زانیاریانەی بە هانا گەیشتووە ؛ هێزە نیزامییەکانی جێگیر کراو لە سنوور بەبێ هیچ جۆرە ئاگادار کردنەوەیەکی پێشوەختە تەقەیان لەم کۆڵبەرە کردووە .
ئەم کۆڵبەرە لاوە دەسگیراندار بووە و بۆ دەست خستنی بژیوی ژیانی بنەماڵەکەی ڕووی لە کۆڵبەری کردبوو .
شایانی باسە تا ساتی ئامادە کرانی ئەم ڕاپۆرتە ، تەرمی خالد محەمەدی لە نەخۆشخانە ڕاگیراوە و ڕادەستی بنەماڵەکەی نەکراوەتەوە .
بە پێی ئەو ئامارانەی لە لایەن رێکخراوی مافی مرۆڤی هاناوە کۆکراوەتەوە ، حاڵەتەکانی تەقە کردن لە کۆڵبەران لە ناوچە سنووریەکانی کوردستان بەبێ ڕچاو کردنی بنەما یاساییەکان و هۆشداریدان و ئاگادار کردنەوەی پێشوەختە ، بەردەوام لە نیگەرانیە جددیەکانی چالاکانی مافی مرۆڤ بووە و دووبارە بوونەوەی ئەم ڕووداوانە نیشانەی نەبوونی گەرەنتی ئیمەنی و پشتیوانی یاسایی بۆ کۆڵبەرانی بێبەش لەم ناوچانەیە .