بەپێی ڕاپۆرتی ڕێکخراوی مافی مرۆڤی هانا، پاش تێپەربوونی ١٠ ڕۆژ لە دەستبەسەرکردنی واحید سوڵتانی، لاویی ٢١ ساڵە خەڵکی گوندی خڕنج سەر بە پیرانشار، هیچ زانیارییەک سەبارەت بە باری تەندرووستی، چارەنووس و شوێنی راگرتنی نییە.
بەپێی زانیارییەکان، هێزە ئەمنیەتیەکان هەڵیان کوتاوەتە سەر ماڵی ناوبراو و بێ بەڵگەو بڕیاری دادگا دەستبەسەریان کردووە. لە کاتی دەستبەسەرکردنەوە تا ئێستا بنەماڵەکەی هیچ زانیارییەک سەبارەت بە شوێنی راگرتن، باری جەستەیی و یاسایی و هۆکارەکانی دەستبەسەرکردنیان نییە.
تا کاتی ئامادەکردنی ئەم ڕاپۆرتە، هیچ کام لە دەزگا ئەمنیەتیەکان دەستبەسەرکردنی ناوبراویان لە ئەستۆ نەگرتووە، هەروەها هیچ زانیارییەک سەبارەت بە تۆمەت، شوێنی راگرتن و پرۆسەی بەدواداچوونی دادوەریی دۆسیەکەی بڵاو نەکراوەتەوە.
ڕێکخراوی مافی مرۆڤی هانا، هاوکات لەگەڵ دەربڕینی نیگەرانی سەبارەت بە بە درێژەی دەستبەسەری و بێئاگایی لە چارەنووسی واحید سوڵتانی، جەخت لەوە دەکاتەوە کە بێبەشکردنی دەستبەسەرکراوان لە مافی پەیوەندی لەگەڵ بنەماڵە، دەستگەیشتن بە پارێزەر و ئاگاداربوون لە دۆخی یاسایی، پێشێلکردنی بنەما بنچینەییەکانی دادگایی دادپەروەرانە و مافە دەستنیشانکراوەکان لە یاساکانی ناوخۆ و پابەندییە نێودەوڵەتییەکانی کۆماری ئیسلامی ئێرانە. بۆیە، هانا داوای ڕۆنکردنەوەی دەستبەجێی دۆخ و شوێنی راگرتنی واحید سوڵتانی، دڵنیابوون لە دەستگەیشتنی بێمەرجی بە پارێزەر و بنەماڵە، و ڕێزگرتنی تەواو لە مافە یاسایییەکانی لە هەموو قۆناغەکانی دەستبەسەرکردن و دادگایی دەکات.