بە پێی ئەو ڕاپۆرتانەی کە بە رێکخراوی مافی مرۆڤی هانا گەیشتووە: ڕۆژی سێشەممە ٤ی سەرماوەزی ١٤٠٤ (٢٥ی نۆڤەمبەری ٢٠٢٥) کرێکارێک بە ناوی عەلیرەزا موساپور تەمەن ٤٠ ساڵ، کوڕی حەمید، خەڵکی ئاوایی “کاپیک”ی سەر بە شاری سەڵماس و دانیشتوویی ناوچەی کوشتارگای ورمێ، لە جەریانی بەستنی ئاسانسۆڕ لە بینایەک لە گەڕەکی فەزڵای یەک، توشی ڕووداوی کار بووە و گیانی لە دەستداوە.
بە پێی ئەم ڕاپۆرتە؛ ناوبراو لە کاتی کارکردن لە قاتی چوارەمەوە کەوتووەتە ناو چاڵی ئاسانسۆڕ و بە هۆی سەختی برینەکانیەوە دەستبەجێ گیانی لە دەستداوە.
شایانی باسە پێڕانەگەیشتنی بەرپرسان بە سەر شێوەی کار و دۆخی کرێکاران و ئەمنییەتی شوێنی کار ، لەولاشەوە کەمتەرخەمی خاوەنکاران لە هۆکارە سەرەکییەکانی نەبوونی ئەمنییەتی شوێنی کارە و ئەم بارودۆخە بووەتە هۆی ئەوەی ژمارەیەکی بەرچاو لە کرێکار لە ساڵدا بە هۆی رووداوی شوێنی کار گیانیان لە دەست بدەن یا بریندار بن. هەر بۆیە وڵاتی ئێران لە باری ئەمنییەتی شوێنی کارەوە لە سەر ئاستی جیهان لە پلەی ١٠٢دایە و بووەتە وڵاتێکی زۆر نائەمن بۆ کرێکاران.